माय मराठीचे श्लोक...!!
(वृत्त – भुजंगप्रयात)
नमो मायभाषा! जयोस्तुss मराठी!
तुझे शब्द सान्निध्य माझे ललाटी
जडो ध्यास हा छंद व्यासंग बोली
घडो हे समस्ता! नमो मायबोली..!!
तुझे शब्दलालित्य सूरास मोही
तसा नादब्रह्मांस आनंद होई
सुरांच्या नभी सूरगंगा नहाली
घडो हे समस्ता! नमो मायबोली..!!
जरी वेगळी बोलती बोलभाषा
अनेकांत एकत्व ही प्राणभाषा
असे भाग्य आम्हां मराठी मिळाली
घडो हे समस्ता! नमो मायबोली..!!
असा मावळा गर्जला तो रणाला
तसा घोष "हर हर महादेव" झाला
मराठी तुतारी मराठी मशाली
घडो हे समस्ता! नमो मायबोली..!!
अभय एक निश्चय मनासी करावा
ध्वजा जीव ओवाळुनी फ़डकवावा
सदा शब्द वाणीत ये सर्वकाली
घडो हे समस्ता! नमो मायबोली..!!
गंगाधर मुटे
..............................................
..............................................
नमस्ते सर,
मला ही साईट खूप आवडली.खासकरून जात्यावरील गाणे.
माझी आई आजही कधीकधी घरी दळण करतांना खूप छान गाणे म्हणते.
मलाही वाटते तिच्याकडील हा ठेवा इतरांनाही मिळावा. पण कसा?
मी अजून पूर्ण साहित्य नाही वाचले. पण जे वाचले ते अगदी खूप आवडले.
पण ह्या साईटवरील महिलाविश्व ह्यामधील जात्यावरील गाणी वाचले आणि वाटले की
तुम्ही ग्रामीण महिलांचे जीवन अगदी समोर उभे केले.
खरेच खूप खूप धन्यवाद.
मंदाकिनीजी,
प्रतिसादाबद्दल धन्यवाद.
आईला येत असलेली जात्यावरची गाणी लिहून माझ्या मेल वर पाठविली तर येथे ती प्रकाशित करता येईल.
आईचे नांव व पत्ता दिल्यास फ़ारच चांगले. पण ही बाब ऐच्छीक आहे.
त्यामुळे संकलन अधिक बहूविध होईल.
गंगाधर मुटे