गहाणात ७/१२…..
गहाणात हा सातबारा वगैरे
तरी वाढतो शेतसारा वगैरे
जिथे ढेप-सरकी तिथे थांबते ही
घरी खात नाहीच चारा वगैरे
रुबाबात लक्ष्मी पुसे शारदेला
हवी काय खुर्ची, निवारा वगैरे?
अता अन्य काहीच पर्याय नाही
करावाच लागेल ’मारा’ वगैरे
बढाई असूदे तुझी तूजपाशी
कुणी ना इथे ऐकणारा वगैरे
कशाला अशी सांग दर्पोक्तवाणी?
तुला कोण येथे भिणारा वगैरे?
खुले नेत्र ठेऊन गिळतो नशेला
खरा तोच असतो पिणारा वगैरे
कधी झोप मोडेल सुस्तावल्यांची?
किती वाजवावा नगारा वगैरे
इथे पावलोपावली लाचखोरी
कुणाचाच नाही दरारा वगैरे
’अभय’ भोवती घे लपेटून धारा
प्रवाहास नसतो किनारा वगैरे
– गंगाधर मुटे
——————————————
(धन्यवाद वैभव जोशी)
रानमोगरा 
गंगाधरजी, तुमची गझल मनापासून आवडली.