हवी कशाला मग तलवार ?
मकरंदाहुनि मधुर तरीही
शर शब्दांचे धारदार
तळपत असता जिव्हा करारी
हवी कशाला मग तलवार ?……!!
शब्दच असती कवच कुंडले
शब्दच चिलखत होती
शब्दच होती आयुधे ऐसी
नभास भेदुनि जाती
शब्द खड्ग अन् शब्द ढालही
परतवती ते हरेक वार…….!!
नवनीताहून मऊ मुलायम
कधी कणखर वज्रे
आसवांनी भिजती पापण्या
कधी खळखळ हसरे
हीनदीनांचे सांत्वन करिती
गाजविती दरबार….!!
भुंग्यासम शब्दांची गुणगूण
कधी व्याघ्राची डरकाळी
शब्द फटाके, शब्द फुलझडी
कधी नीरवता पाळी
जोषालागी साथ निरंतर
कधी विद्रोही फूत्कार ….!!
सृजनशीलता-करुणा-ममता
संयम विभूषित वस्त्रे
हजरजबाबी, तलम,मधाळही
परि कधी निर्भीड अस्त्रे
पांग फेडण्या भूचे अभये
तळहातावर शिर शतवार …!!
गंगाधर मुटे
………… **………….. **…………
रानमोगरा 
Apratim Gangadhar ji …………..Agadi Apratim……………superbbbbbbbb………simply superbbbbbbbb………..hatss off to you……
धन्यवाद गणेशजी.